已為人妻

終於完成咗我同little嘅婚禮, 雖然有啲辛苦, 但很開心, 這幾天感覺好得意, 一日內改變咗好多嘢, 尤其係稱呼, 由世伯伯母變成老爺奶奶, 由男朋友變成老公. 由單身變成雙身(已婚). 雖然壓力難免大咗, 但相信只要盡咗力, 亦無愧於心.

昨日回娘家執拾自己嘅衣物, 離開時遠遠見到媽咪流淚. 當一刻好心痛, 感覺好似我令媽咪唔開心咁, 我知道佢地唔捨得我, 其實我都係. 好在我唔係嫁得遠, 可以話見就見唧!

結婚當日, 得到好多親友嘅幫忙和祝福, 在此再說一次'謝謝你們'. 尤其一直响我身邊二十年嘅一位好友及其丈夫, 每次我有需要, 佢都會無聲無色咁出現眼前, 雖然有時長氣咗啲, 但不知不覺間我地已經由兩pair人, 變為4個好朋友了!

仲有兩日

今日去咗攞衫, 唔知係唔係之前瘦咗啲, 呢幾日糊作非為, 放心係咁食, 定一或食咗啲鼻敏感藥, 有啲水腫, 今日啲裙全部都好窄, 有啲仲要改返鬆添, 我唔制呀...............!

今日開始放假, 原本打算只係放半日去攞衫, 但又覺得好似唔多夠開心, 所以最終都係決定由今日開始連放六日, 直到下星期三先返工. 哈哈哈.

第5日

Little 表姐嘅預產期同我地同一日, 都係516, 所以我地時不時都有share吓大家嘅感受, "你點呀, 緊張嘛? 我都有啲喇!" ..........等等! 但我諗生bb 會比我地更緊張, 人命來架喎, 更係要小心啲啦! 不過, 得知上星期六bb已經平安登陸地球, 咁都可以鬆一口氣.............., 在此祝表姐身體可以盡快康復, bb精乖玲琍!



我地嘅婚期就無得好似表姐咁unexpected提早喇, 日子一日.....一日咁過, 仲有5日, 有時好想快啲, 有時又唔想咁快, 有時好期待婚後生活, 有時又有啲担心結婚後唔知會點鬼樣相處. 哈! 仲知好矛盾, 但總括而言都係開心多過担心嘅, 人大了, 無論單身定已婚, 總要面對長大後獨立嘅生活, 而且, 能夠搵到一個自己願意而佢又願意同自己一生一世嘅人共渡餘生, 對我來講都係一種幸福.

第8日

呢幾日都開始忙於試衫呀, rundown呀咁, 而且公司又多嘢做, 攪到想寫blog都無時間, 進場音樂用咗一首英文舊歌'Loving you', 記得細個時有個好似叫Fornari牛仔褲廣告係用呢首歌, 仲影住個女仔响張床著褲. 好鍾意其中一段: No one else can make me feel the colors that you bring, stay with me while we grow old and we will live each day in springtime. 中文來講即係: 執子之手, 與子偕老. 我最'林'嗰句呢.......

尋日去咗final fit, 終於比我等到瘦咗啲喇, 都話啦! 唔使減嘅, 到時自然就會瘦. 哈

之前同朋友講覺得攪結婚有啲煩, 好想快啲過咗結婚呢段時間, 而且, 有種感覺, 我唔係主角, 只係一個party嘅攪手去滿足賓客嘅需要, 但佢叫我唔好諗咁多, 要enjoy而家呢一刻待嫁的心情, 準新娘係應該靚啲開心啲. 我消化咗佢嘅說話之後, 都覺得好啱, 每個人每一個stage都會有轉變, 有唔同嘅嘢要面對, 我係應該活在當下, 攪手咪攪手囉, 做個靚攪手總好過做醜主角........

開始倒數: 第11日

仲有十一日就係我地嘅大日子, 心情開始緊張起來, 夜晚亦開始唔可以5分鐘內就大覺訓, 而且開始忙碌, 買這樣, 取那樣, confirm呢啲, 又做漏嗰啲咁, 又担心到時會唔會落雨呀, 病呀, 生暗瘡呀咁................ anyway, 我都會盡量留時間寫blog, 因為寫低而家嘅心情, 將來可以做個紀念! 到時可能會覺得自己好低能.

H1N1來到喇.....

今日香港確診第一宗甲型流感H1N1個案(前稱:豬流感)，因為呢種病毒會經空氣人傳人, 而且會至命, 我地聽到都好驚. Little尢其担心, 因為佢怕會影響到15日後我地嘅婚禮, 雖然我都有啲担心, 但天災人禍嘅嘢我地跟本控制唔到, 可以做嘅只係小心身體, 放鬆心情, 如果唔係到到嗰日原來咩事都無發生, 但我地卻因壓力而病咗咪仲唔底. 佢都好明白, 所以好快就無事了.

我暫時無小朋友, 亦唔知會唔會有, 但有時都好担心我地嘅下一代要面對愈來愈嚴重嘅生態環境轉變, 全球暖化和病毒變種等呢啲問題, 雖然物質上嘅嘢愈來愈豐富, 但生活卻變得艱辛. 我對環保科學呢啲嘢一曉不通, 但我都覺得係我地人類浪費所一手做成, 所以, 而家我都會盡量少買嘢, 少用電, 食唔曬就唔叫咁多嘢食啦.

希望今次個病可以快啲搵到預防和治療方法, 離開我地, 離開地球吧!